ISRO: ఈ ఏడాది ఇస్రో నుంచి 19 రాకెట్‌ ప్రయోగాలు

శ్రీహరికోట, న్యూస్‌టుడే : భారత అంతరిక్ష పరిశోధన సంస్థ(ఇస్రో) ఈ ఏడాది 19 ప్రయోగాలు చేపట్టాలని లక్ష్యంగా పెట్టుకుంది. ఇందులో 8 రాకెట్లు, 7 అంతరిక్ష నౌకలు, 4 టెక్నాలజీ డెమాన్‌స్ట్రేషన్‌ ప్రయోగాలు ఉన్నాయి. వీటిల్లో చంద్రయాన్‌-3 కూడా ఉంది. ఈ ఏడాది తొలి రాకెట్‌ ప్రయోగం (పీఎస్‌ఎల్‌వీ-సి52) ఫిబ్రవరి 14న సతీశ్‌ ధవన్‌ స్పేస్‌ సెంటర్‌ షార్‌ నుంచి చేపట్టనుంది. ఇది భూ పరిశీలన ఉపగ్రహం (ఆర్‌ఐశాట్‌-1ఎ)తోపాటు ఐఎన్‌ఎస్‌-2డి ఉపగ్రహాలను కక్ష్యలోకి మోసుకెళ్లనుంది. చంద్రయాన్‌-3 ప్రయోగం ఆగస్టులో చేపట్టేలా ప్రణాళికలు రచించారు. దీనిని గతేడాదే చేపట్టాలని నిర్ణయించినా కొవిడ్‌ వల్ల వాయిదా వేశారు. 2020, 2021లో కరోనా మహమ్మారి వల్ల ఇస్రో రాకెట్‌ ప్రయోగాలు సక్రమంగా చేపట్టలేకపోయింది.