PF interest rate: పీఎఫ్‌ వడ్డీరేటుపై మార్చిలో నిర్ణయం

దిల్లీ: ఉద్యోగుల భవిష్యనిధి సంస్థ (ఈపీఎఫ్‌వో)కు చెందిన అత్యున్నత నిర్ణాయక మండలి సెంట్రల్‌ బోర్డు ఆఫ్‌ ట్రస్టీ (సీబీటీ) మార్చి నెల్లో సమావేశమై 2021-22కు సంబంధించి ఉద్యోగుల భవిష్యనిధి డిపాజిట్ల వడ్డీ రేటు విషయమై ఓ నిర్ణయం తీసుకోనుంది. ‘‘ఈపీఎఫ్‌వో సీబీటీ  సమావేశం అస్సాంలోని గువాహటిలో  మార్చి నెల్లో జరగనుంది. ఆర్థిక సంవత్సరం ముగింపు దశకు వస్తున్నందున 2021-22కు సంబంధించి వడ్డీ రేటు ప్రతిపాదనను చర్చించాల్సిన అంశాల జాబితాలో చేర్చాం’’ అని కేంద్ర కార్మిక శాఖ మంత్రి భూపేందర్‌ యాదవ్‌ ఆదివారం పీటీఐ వార్తా సంస్థకు తెలిపారు. 2021-22 సంవత్సరానికి సంబంధించి ఈపీఎఫ్‌ వడ్డీ రేటుపై మంత్రిని ప్రశ్నించగా ఆయన ఈ విషయాన్ని వెల్లడించారు. 2020-21 ఏడాదికి ఇచ్చినట్లుగానే 2021-22లో కూడా 8.5 శాతం వడ్డీ రేటు ఉంటుందా అని ప్రశ్నించగా.. ఆదాయ అంచనాల ప్రకారం నిర్ణయం తీసుకుంటామని మంత్రి బదులిచ్చారు.