నీట్‌ యూజీ పరీక్ష జులై 17న!

దిల్లీ: వైద్య కళాశాలల్లో ప్రవేశాల కోసం నిర్వహించే జాతీయ అర్హత, ప్రవేశ పరీక్ష(నీట్‌-యూజీ)ను జులై 17న నిర్వహించే అవకాశం ఉంది. జాతీయ వైద్య కమిషన్‌తో సంప్రదించి ఈ తేదీని నిర్ణయించినట్లు
తెలుస్తోంది. త్వరలో దీనికి సంబంధించిన నోటిఫికేషన్‌ వెలువడనుందని వైద్య విద్యశాఖ సీనియర్‌ అధికారి ఒకరు వెల్లడించారు. దేశవ్యాప్తంగా 13 భాషల్లో ఈ పరీక్షను రాయవచ్చు. పరీక్షార్థులు ఆన్‌లైన్‌లో తమ పేర్లను మే 7వ తేదీ వరకు నమోదు చేసుకోవచ్చని, ఆ తర్వాత అయిదు రోజుల వరకు తప్పులను సరిచేసుకునేందుకు అవకాశం ఇస్తారని వెల్లడించారు.