Gift: 100 మంది ఉద్యోగులకు ‘కార్లు’ బహుమానం..

వడపళని (చెన్నై), న్యూస్‌టుడే: చెన్నై ప్రధాన కేంద్రంగా పని చేస్తున్న ‘ఐడియాస్‌2ఐటీ’ అనే ఇంజినీరింగ్‌ సంస్థ వందమంది ఉద్యోగులకు కార్లను బహుమానంగా అందించింది. సంస్థ అభివృద్ధికి సేవలందించినందుకు గాను సీఈఓ గాయత్రి వివేకానందన్‌, సంస్థ వ్యవస్థాపకుడు, ఛైర్మన్‌ మురళీ వివేకానందన్‌ సమక్షంలో సోమవారం కార్లను అందజేశారు. 2009లో తమ సంస్థను ప్రారంభించినప్పుడు ఆరుగురు ఇంజినీర్లు మాత్రమే ఉండేవారని.. ప్రస్తుతం 500 మందికిపైగా నిపుణులు యూఎస్‌, మెక్సికో, భారత్‌లలో పని చేస్తున్నారని నిర్వాహకులు చెప్పారు. ఫేస్‌బుక్‌,  మైక్రోసాఫ్ట్‌, ఒరాకిల్‌ వంటి పలు దిగ్గజ సంస్థలకు సాఫ్ట్‌వేర్‌ ప్రాజెక్టులను తాము అందిస్తున్నట్లు పేర్కొన్నారు. వందమంది ఉద్యోగులకు కార్లు బహూకరించడం ఆనందంగా ఉందని చెప్పారు. సంస్థ అభివృద్ధికి మూలస్తంభాలుగా సేవలందించిన వారిని అభినందించారు.