Chocolate: చాక్లెట్‌ కోసం నది ఈది.. సరిహద్దు దాటి భారత్‌లోకి..

జైలుపాలైన బంగ్లాదేశ్‌ బాలుడు 

బంగ్లాదేశ్‌కు చెందిన ఓ బాలుడు తనకు నచ్చిన చాక్లెట్‌ కొనుక్కోవడానికి పెద్ద సాహసమే చేశాడు. నదిని ఈదుకుంటూ దాటి, సరిహద్దుల్లో ఏర్పాటు చేసిన కంచెను దాటుకుని భారత్‌లోకి అక్రమంగా ప్రవేశించాడు. ఆ తర్వాత అతడికి ఊహించని షాక్‌ తగిలింది. సరిహద్దు భద్రతా దళం(బీఎస్‌ఎఫ్‌) సిబ్బంది అతణ్ని అదుపులోకి తీసుకుని పోలీసులకు అప్పగించారు. వారు ఆ బాలుణ్ని స్థానిక కోర్టులో హాజరుపర్చగా 15 రోజుల రిమాండ్‌ విధించింది. భారత్‌-బంగ్లాదేశ్‌కు సరిహద్దులో ఉండే షాల్డా నది సమీపంలోని ఓ గ్రామంలో ఉంటాడతడు. భారత్‌లో దొరికే చాక్లెట్లు అంటే అతనికి చాలా ఇష్టం. అందుకే అప్పుడప్పుడు వాటి కోసం త్రిపుర సిపాహీజలా జిల్లాలోని కలామ్‌చౌరా గ్రామానికి వస్తుండేవాడు. ముందు షాల్డా నదిని ఈది, భారత్‌ వైపునకు వచ్చేవాడు. దగ్గర్లోని దుకాణంలో చాక్లెట్లు కొనుక్కుని అదే దారిలో తిరిగి వెళ్లిపోయేవాడు. ఈ నెల 13న మరోసారి సరిహద్దు దాటి  అరెస్టయ్యాడు.