హిజాబ్‌ వద్దన్నారని.. పరీక్ష రాయలేదు

ఇంటికి వెళ్లిపోయిన ఇద్దరు విద్యార్థినులు

ఉడుపి, న్యూస్‌టుడే: హిజాబ్‌ ధరించి మాధ్యమిక విద్య(ఇంటర్మీడియట్‌) పరీక్ష రాయడానికి అనుమతి నిరాకరించడంతో ఇద్దరు విద్యార్థినులు ఇంటికి వెళ్లిపోయారు. ఈ సంఘటన ఉడుపి పట్టణంలో శుక్రవారం చోటుచేసుకుంది. ఇద్దరు విద్యార్థినులు హిజాబ్‌తో కళాశాలకు వచ్చారు. లోనికి వెళ్లిన తరువాత ప్రిన్సిపాల్‌తో దాదాపు అరగంటకు పైగా చర్చించారు. తాము హిజాబ్‌తోనే పరీక్ష రాస్తామని స్పష్టం చేయడంతో అందుకు వారు ససేమిరా అన్నారు. ప్రత్యేక గదిలో కూర్చుని పరీక్ష రాసేందుకు అవకాశం కల్పించాలని విజ్ఞప్తి చేశారు. అందుకు కూడా కళాశాల యాజమాన్యం నిరాకరించడంతో హాల్‌ టికెట్లు తీసుకున్నా పరీక్ష రాయకుండా ఇంటికి వెళ్లారు. రాష్ట్ర వ్యాప్తంగా అనేక మంది విద్యార్థినులు హిజాబ్‌తో కళాశాలల వరకు వచ్చినా.. అక్కడ తొలగించి లోనికి వెళ్లడం కనిపించింది.