కొవోవాక్స్‌ డోసు ధర రూ.225కి తగ్గింపు

సీరమ్‌ ఇన్‌స్టిట్యూట్‌ ఆఫ్‌ ఇండియా

దిల్లీ: ప్రైవేట్‌ కేంద్రాల్లో 12-17 ఏళ్ల పిల్లలకు టీకాలు వేయడానికి ఉద్దేశించిన కొవోవాక్స్‌ డోసు ధరను రూ.900 నుంచి రూ.225కి తగ్గిస్తున్నట్లు సీరమ్‌ ఇన్‌స్టిట్యూట్‌ ఆఫ్‌ ఇండియా పేర్కొంది. అయితే దీనికి జీఎస్టీ, సేవా పన్ను అదనమని వెల్లడించింది. మంగళవారం ఈ విషయాన్ని ఆ సంస్థ ప్రతినిధులు కేంద్ర ప్రభుత్వానికి తెలియజేసినట్లు సమాచారం.

దేశంలో అందుబాటులోకి..

12-17 ఏళ్ల పిల్లలకు సంబంధించిన కొవోవాక్స్‌ టీకా దేశవ్యాప్తంగా అందుబాటులో ఉందని సీరమ్‌ ఇన్‌స్టిట్యూట్‌ ఆఫ్‌ ఇండియా సీఈఓ అధర్‌ పూనావాలా తెలిపారు. భారత్‌లో తయారై ఐరోపాలో కూడా విక్రయించిన ఏకైక టీకా ఇదేనని ఈ మేరకు ఆయన మంగళవారం ట్విటర్‌లో పేర్కొన్నారు. ఈ టీకా 90శాతం కంటే ఎక్కువ సామర్థ్యం కలిగి ఉందని తెలిపారు.