భర్తను కోల్పోయి.. 30 ఏళ్లుగా ఆమె అతడుగా..

ఆర్కేనగర్‌, న్యూస్‌టుడే: భర్తను కోల్పోయిన ఓ మహిళ 30 సంవత్సరాలుగా పురుషుడి వేషధారణలో జీవిస్తున్న ఘటనిది. తమిళనాడు రాష్ట్రంలోని తూత్తుకుడి జిల్లా కాట్టునాయక్కన్‌పట్టి గ్రామంలో ఉంటున్న ముత్తు మాస్టర్‌ లుంగీ, చొక్కా ధరించి పురుషుడిలా కనిపిస్తుంది. ఆమె అసలు పేరు పేచ్చియమ్మాల్‌ (60). 30 ఏళ్ల క్రితం వివాహమైంది. ఆ తర్వాత కొన్ని రోజులకే గుండెపోటుతో భర్త మృతి చెందాడు. అప్పటికే ఆమె గర్భం దాల్చింది. అనంతరం ఆడబిడ్డకు పేచ్చియమ్మాల్‌ జన్మనిచ్చింది. కుటుంబాన్ని పోషించేందుకు కూలి పనులకు వెళ్లిన ఆమెకు పురుషుల నుంచి వేధింపులు ఎదురయ్యాయి. దీంతో తనతోపాటు కుమార్తెను కాపాడుకునేందుకు చొక్కా, లుంగీ ధరించడం అలవాటు చేసుకుంది. జుట్టునూ పురుషుల మాదిరిగా కత్తిరించుకుంటుంది. పలు హోటళ్లు, చెన్నైలోని టీ దుకాణంలో పని చేసింది. ఆమెను అందరూ ముత్తు మాస్టర్‌ అని పిలుస్తుండటంతో తన పేరును ముత్తుగా మార్చుకుంది. ప్రస్తుతం ఆమె రంగులు వేయడం, ఉపాధి హమీ పనులకు వెళ్తూ జీవనం గడుపుతోంది.