ఎల్జీ ప్రమాణస్వీకారం నుంచి హర్షవర్ధన్‌ వాకౌట్‌!

దిల్లీ: కొత్త లెఫ్టినెంట్‌ గవర్నర్‌ (ఎల్జీ) వినయ్‌కుమార్‌ సక్సేనా ప్రమాణస్వీకార వేడుక నుంచి కేంద్ర మాజీ మంత్రి, దిల్లీలోని చాందినీ చౌక్‌ ఎంపీ హర్షవర్ధన్‌ అసహనంగా వెళ్లిపోవడం గురువారం చర్చనీయాంశంగా మారింది. రాజ్‌నివాస్‌లో ఏర్పాటుచేసిన ఈ వేడుకకు వచ్చిన హర్షవర్ధన్‌ ఓ చోట కూర్చొని ఉండగా, అది రిజర్వుడు స్థానమంటూ ఓ అధికారి ఆయన్ను లేపారు. ఆ తర్వాత పదిహేను నిమిషాలు అక్కడే వేచి ఉన్నా హర్షవర్ధన్‌కు మరో ఆసనం చూపకపోవడంతో కార్యక్రమం నుంచి ఆయన వెళ్లిపోయారు. ఈ విషయాన్ని ట్విటర్‌ ద్వారా పంచుకొన్న మాజీ మంత్రి దిల్లీ ఎంపీగా ఉంటూ.. కొత్త ఎల్జీ ప్రమాణ స్వీకారోత్సవంలో పాల్గొనలేకపోయానని విచారం వ్యక్తం చేశారు.