చౌటాలాకు నాలుగేళ్ల జైలుశిక్ష

హరియాణా మాజీ సీఎంపై 17 ఏళ్లు నడిచిన సీబీఐ కేసు

దిల్లీ: ఆదాయానికి మించిన ఆస్తుల కేసులో హరియాణా మాజీ ముఖ్యమంత్రి ఓం ప్రకాశ్‌ చౌటాలా (87)కు శుక్రవారం దిల్లీ కోర్టు నాలుగేళ్ల జైలుశిక్ష విధించింది. 1993 - 2006 మధ్యకాలంలో అక్రమ ఆస్తుల సేకరణకు పాల్పడినందుకుగాను చౌటాలాకు రూ.50 లక్షల జరిమానా కూడా విధించారు. ఆయన స్వాధీనంలో ఉన్న నాలుగు ఆస్తులను జప్తు చేయాలని ప్రత్యేక జడ్జి వికాస్‌ ధుల్‌ అధికారులను ఆదేశించారు. తనకున్న ఆస్తులకు సరిపడా లెక్కలు చూపడంలో విఫలమైన చౌతాలను దోషిగా గత వారం కోర్టు నిర్ధారించింది. ఈయనపై 2005లో కేసు నమోదు చేసిన సీబీఐ 2010లో ఛార్జిషీటు దాఖలు చేసింది. 1999 జులై 24 నుంచి 2005 మార్చి 5వ తేదీ వరకు చౌటాలా హరియాణా ముఖ్యమంత్రిగా పదవీ బాధ్యతల్లో ఉన్నారు. ఈ సమయంలో తన పేరిట, కుటుంబసభ్యుల పేరిట అక్రమ ఆస్తుల సేకరణకు పాల్పడినట్లు సీబీఐ ఎఫ్‌.ఐ.ఆర్‌.లో పేర్కొంది. ఈ ఆస్తుల విలువ రూ.6.09 కోట్లుగా గుర్తించారు. శుక్రవారం సాయంత్రం 7 గంటలకు చౌటాలాను తిహాడ్‌ జైలుకు తరలించారు.