ప్రియాంకాగాంధీకి కరోనా

దిల్లీ: కాంగ్రెస్‌ పార్టీ ప్రధాన కార్యదర్శి ప్రియాంకా గాంధీ వాద్రా కరోనా బారిన పడ్డారు. ఈ విషయాన్ని శుక్రవారం ఆమె స్వయంగా వెల్లడించారు. ‘‘కొవిడ్‌-19 పరీక్షల్లో పాజిటివ్‌గా తేలింది. స్వల్ప లక్షణాలే ఉన్నాయి. వైద్య మార్గదర్శకాల ప్రకారం.. నేను ఇంట్లో క్వారంటైన్‌లో ఉన్నాను’’ అని ప్రియాంక ట్విటర్‌ వేదికగా తెలిపారు. ఇటీవల తనతో సమావేశమైన వారంతా పరీక్షలు చేయించుకోవాల్సిందిగా ఈ సందర్భంగా ఆమె విజ్ఞప్తి చేశారు. రాష్ట్రస్థాయి చింతన శిబిరంలో పాల్గొనేందుకు బుధవారం లఖ్‌నవూ వచ్చిన ప్రియాంకా గాంధీ వాద్రా గురువారం దిల్లీ చేరుకున్నారు. ప్రియాంక తల్లి, కాంగ్రెస్‌ పార్టీ అధ్యక్షురాలు సోనియా గురువారం కరోనా బారిన పడిన సంగతి తెలిసిందే.