Diabetes: టైప్‌-1 మధుమేహంతో ఆందోళన వద్దు

క్రమం తప్పకుండా ఇన్సులిన్‌ తీసుకుంటే దీర్ఘకాలం సాధారణ జీవితం గడపొచ్చు

‘ఈనాడు’తో ప్రముఖ వైద్య నిపుణుడు డాక్టర్‌ వి.మోహన్‌

ఈనాడు, దిల్లీ: టైప్‌-1 మధుమేహం బాధితులు ఆందోళన చెందాల్సిన అవసరం లేదని ప్రముఖ డయాబెటిస్‌ వైద్య నిపుణుడు డాక్టర్‌ వి.మోహన్‌ అన్నారు. రోజూ క్రమం తప్పకుండా ఇన్సులిన్‌ తీసుకుంటే దీర్ఘకాలం సాధారణ జీవితం గడపొచ్చని పేర్కొన్నారు. ఈ రకం మధుమేహాన్ని ఎదుర్కొనేందుకు తీసుకోవాల్సిన జాగ్రత్తలను సూచిస్తూ భారత వైద్య పరిశోధన మండలి (ఐసీఎంఆర్‌) జారీచేసిన నూతన మార్గదర్శకాల రూపకర్తల్లో ఒకరైన ఆయన తాజాగా ‘ఈనాడు’తో ప్రత్యేకంగా మాట్లాడారు. పలు అంశాలపై తన అభిప్రాయాలు పంచుకున్నారు. ‘‘దేశంలో టైప్‌-1 మధుమేహ బాధితులు 2.5 లక్షల మంది దాకా ఉన్నారు. వీరు ఒక్కరోజు ఇన్సులిన్‌ తీసుకోకపోయినా మరణించే ముప్పు ఉంటుంది. రోజుకు 3-4సార్లు ఇన్సులిన్‌ తప్పనిసరిగా తీసుకోవాలి. ఈ తరహా మధుమేహం సాధారణంగా 15 ఏళ్లలోపు పిల్లల్లో వస్తుంది. అయితే కేవలం పిల్లలకే పరిమితం అవుతుందనుకోవడానికి వీల్లేదు. పెద్దల్లోనూ రావొచ్చు. దేశంలో టైప్‌-1 మధుమేహ బాధితుల సంఖ్య ఏటా 10 వేల వరకూ పెరుగుతోంది. ప్రధానంగా జన్యులోపం కారణంగా ఈ వ్యాధి వస్తుంది. బాధితులు ఇన్సులిన్‌ తీసుకుంటూ ఉంటే సాధారణ జీవితానికి ఎలాంటి ఢోకా ఉండదు. ప్రస్తుతం ఈ ఔషధాన్ని ప్రభుత్వ ఆసుపత్రుల్లో ఉచితంగానే అందిస్తున్నారు. అనవసరంగా నాటువైద్యుల సలహాలతో మూలికలు, పసరు వంటివి వాడుతూ ప్రాణాల మీదకు తెచ్చుకోవద్దు’’ అని వి.మోహన్‌ సూచించారు.