ఆన్‌లైన్‌ బెట్టింగ్‌ ప్రకటనలు ప్రచురించ వద్దు

ప్రసార మాధ్యమాలకు కేంద్రం సూచన

ఈనాడు, దిల్లీ: ఆన్‌లైన్‌ బెట్టింగ్‌ ప్లాట్‌ఫామ్స్‌కు సంబంధించిన ప్రకటనలను ప్రచురించరాదని ప్రచార, ప్రసార మాధ్యమాలకు కేంద్ర ప్రభుత్వం సూచించింది.  ఆన్‌లైన్‌ బెట్టింగ్‌ వెబ్‌సైట్స్‌, ప్లాట్‌ఫామ్స్‌కు సంబంధించిన ప్రకటనలు వివిధ ప్రింట్‌, ఎలక్ట్రానిక్‌, సామాజిక, ఆన్‌లైన్‌ మీడియాల్లో ప్రత్యక్షమవుతున్నందున ఈ సూచనను జారీ చేస్తున్నట్లు కేంద్ర సమాచార, ప్రసారాల శాఖ తెలిపింది. దేశంలో చాలాచోట్ల బెట్టింగ్‌, జూదం అన్నవి చట్టవిరుద్ధమైన కార్యకలాపాలని, వాటి వల్ల వినియోగదారులకు సామాజిక, ఆర్థిక ముప్పు వాటిల్లుతోందని పేర్కొంది. ముఖ్యంగా యువత, పిల్లలు దీని బారినపడి నష్టపోతున్నట్లు తెలిపింది. ఈ ప్రకటనలు వినియోగదారులను తప్పుదోవ పట్టించేలా ఉంటున్నాయని, వినియోగదారుల హక్కుల రక్షణ చట్టం-2019, అడ్వర్టయిజింగ్‌ కోడ్‌ అండర్‌ ది కేబుల్‌ టెలివిజన్‌ నెట్‌వర్క్‌ రెగ్యులేషన్‌ యాక్ట్‌-1995, ప్రెస్‌ కౌన్సిల్‌ చట్టం 1978 కింద రూపొందించిన నిబంధనలకు అనుగుణంగా ఉండటం లేదని పేర్కొంది. విస్తృత ప్రజాప్రయోజనాలను దృష్టిలో ఉంచుకొని ఈ సూచనను జారీ చేస్తున్నట్లు తెలిపింది.