ఐబీ డైరెక్టర్‌గా తపన్‌కుమార్‌ డేకా

ఈనాడు, దిల్లీ: కేంద్ర ఇంటెలిజెన్స్‌ బ్యూరో(ఐబీ) డైరెక్టర్‌గా 1988 బ్యాచ్‌ హిమాచల్‌ప్రదేశ్‌ క్యాడర్‌ ఐపీఎస్‌ అధికారి తపన్‌కుమార్‌ డేకా నియమితులయ్యారు. ఇప్పటివరకు ఈ స్థానంలో ఉన్న 1984 అస్సాం క్యాడర్‌ ఐపీఎస్‌ అధికారి అరవింద కుమార్‌ పదవీకాలం పూర్తికావడంతో డేకాను నియమిస్తూ నియామక వ్యవహారాల కేబినెట్‌ కమిటీ ఆమోదముద్ర వేసింది. కొత్త డైరెక్టర్‌ బాధ్యతలు చేపట్టిన నాటి నుంచి రెండేళ్లపాటు ఈ పదవిలో ఉంటారు. డేకా ప్రస్తుతం ఇంటెలిజెన్స్‌ బ్యూరోలో ఆపరేషన్స్‌ డెస్క్‌ బాధ్యతలు చూస్తున్నారు.

రా కార్యదర్శి పదవీకాలం మరో ఏడాది పొడిగింపు
మరోవైపు రీసెర్చ్‌ అండ్‌ అనాలసిస్‌ వింగ్‌(రా) సెక్రెటరీగా పనిచేస్తున్న 1984 బ్యాచ్‌ పంజాబ్‌ క్యాడర్‌ ఐపీఎస్‌ అధికారి సామంత్‌కుమార్‌ గోయల్‌ పదవీకాలాన్ని మరో ఏడాది పొడిగిస్తూ కేంద్ర ప్రభుత్వం ఉత్తర్వులు జారీచేసింది. ఇదివరకు రెండేళ్ల పదవీకాలం పూర్తయిన తర్వాత ఇలా ఏడాది పాటు ఆయన పదవీకాలాన్ని పొడిగించడం ఇది రెండోసారి.