Train Toilets: రైళ్లలో మరుగుదొడ్ల పర్యవేక్షణకు బాధ్యులు

దిల్లీ: రైళ్లలో మరుగుదొడ్లు శుభ్రంగా ఉండటం లేదంటూ వస్తున్న ఫిర్యాదుల నేపథ్యంలో దేశవ్యాప్తంగా రైళ్లను వ్యక్తిగతంగా పర్యవేక్షించి మూల కారణం కనుగొనేందుకు సీనియర్‌ అధికారులకు రైల్వేశాఖ బాధ్యతలు అప్పగించింది. ఇదే క్రమంలో రెండోదశ కింద రైల్వేబోర్డు స్థాయి అధికారులు 3ఏసీ కోచ్‌లలో రోజంతా ప్రయాణిస్తారు. వీరు ప్రయాణికుల ఇబ్బందులను ప్రత్యక్షంగా చూసి తెలుసుకుంటారు. ఈ ప్రక్రియకు వెంటనే శ్రీకారం చుట్టిన రైల్వే అధికారులు గత మూడు రోజుల్లో 544 మరుగుదొడ్ల పరిశీలన అపుడే పూర్తి చేశారు. సాధారణంగా ఈ పనులన్నీ జూనియర్‌ సిబ్బంది చేసేవారు. రైళ్లలో మరుగుదొడ్ల శుభ్రత సరిగా ఉండటం లేదని, నీరు ఉండటం లేదని, సామాజిక మాధ్యమాల్లో ఫిర్యాదులు వెల్లువెత్తుతున్నాయి. ఈ ఫిర్యాదులన్నింటినీ సమీక్షించిన అధికారులు పై నిర్ణయాలు తీసుకున్నారు.