యూనికార్న్‌ హబ్‌గా భారత్‌

మూణ్నాలుగేళ్లలో మరో 122 అంకుర సంస్థలకు ఆ హోదా

‘హ్యూరన్‌ ఇండియా ఫ్యూచర్‌’ సూచీ వెల్లడి

ఈనాడు, బెంగళూరు: దేశంలోని అంకుర సంస్థల్లో వందకు పైగా త్వరలోనే యూనికార్న్‌ స్థాయికి చేరనున్నట్లు ‘హ్యూరన్‌ పరిశోధన సంస్థ’ సమీక్షలో వెల్లడైంది. ఆస్క్‌ వెల్త్‌, హ్యూరన్‌ ఇండియా ఫ్యూచర్‌ యూనికార్న్‌ ఇండెక్స్‌- 2022ను బుధవారం బెంగళూరులో విడుదల చేశారు.

అమెరికా, చైనాల తర్వాత అత్యధిక యూనికార్న్‌ లున్న దేశంగా భారత్‌ ఆవిర్భవించనున్నట్లు ఆస్క్‌ వెల్త్‌ అడ్వైజర్స్‌ సీఈవో రాజేశ్‌ సలూజా, హ్యూరన్‌ ఇండియా ఎండీ అనాస్‌ రెహ్మాన్‌ ఈ సందర్భంగా చెప్పారు. 1 బిలియన్‌ డాలర్లు (రూ.7,892 కోట్ల) విలువకు చేరుకున్న సంస్థను యూనికార్న్‌గా పరిగణిస్తారు. దేశంలో 2000 తర్వాత ప్రారంభించి 200 మిలియన్‌ డాలర్లు- 1 బిలియన్‌ డాలర్ల మధ్య వ్యాపార సామర్థ్యం కలిగి, పబ్లిక్‌ ఎక్స్ఛేంజ్‌ జాబితాలో లేని స్టార్టప్‌లను సమీక్షించారు. వీటిని రెండేళ్లలో యూనికార్న్‌ స్థాయికి చేరే గజెల్స్‌ (జింక), నాలుగేళ్లలో చేరే చీతా (చిరుత)లుగా వర్గీకరించారు. ఈ అంకురాల వ్యాపార, ఉత్పాదన ప్రగతి స్థిరంగా కొనసాగితే రానున్న మూడు నాలుగేళ్లలో 122 అంకురాలు యూనికార్న్‌ స్థాయికి చేరతాయని నివేదిక స్పష్టం చేసింది. వీటి ప్రస్తుత విలువ 49 బిలియన్‌ డాలర్లని, గతేడాదితో పోలిస్తే ఇది 36 శాతం పెరిగిందని పేర్కొంది.

బెంగళూరు టాప్‌

బెంగళూరుకు చెందిన 46 అంకురాలు యూనికార్న్‌ అంచనా జాబితాలో ఉన్నాయి. దిల్లీ నుంచి 25, ముంబయి నుంచి 16 స్టార్టప్‌లకూ దీనిలో చోటు దక్కింది. ఈ అంకురాల్లో అత్యధికం (27) ఫిన్‌టెక్‌వి కాగా.. తర్వాత ఈ-కామర్స్‌ (14), సాఫ్ట్‌వేర్‌ సేవలు (11), ఎడ్యుటెక్‌ (7) ఉన్నాయి. భవిష్యత్తు యూనికార్న్‌ వ్యవస్థాపకుల్లో అత్యధికులు (22) ఐఐటీ దిల్లీ పట్టభద్రులు కాగా తర్వాత స్థానాల్లో ఐఐటీ ఖరగ్‌పూర్‌ (18), ఐఐటీ ముంబయి (18), ముంబయి వర్సిటీ (17), బిట్స్‌ పిలానీ(14) ఉన్నట్లు నివేదిక పేర్కొంది.

► Read latest India News and Telugu News

► Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.