మెట్లపై జారిపడ్డ లాలూ..

విరిగిన భుజం

పట్నా: రాష్ట్రీయ జనతాదళ్‌ (ఆర్జేడీ) అధ్యక్షుడు, బిహార్‌ మాజీ ముఖ్యమంత్రి లాలూప్రసాద్‌ యాదవ్‌ ఆదివారం మెట్ల పైనుంచి జారిపడటంతో వీపు భాగాన గాయమై భుజం విరిగింది. లాలూ కుటుంబ సన్నిహితవర్గాలు ఈ విషయం వెల్లడించాయి. భార్య రబ్రీదేవి నివాసంలో ఉంటున్న లాలూ ఇంటి మెట్లపై జారిపడ్డారు. పలు అనారోగ్య సమస్యలతో బాధపడుతూ మూత్రపిండ మార్పిడి చికిత్స కోసం విదేశాలకు వెళ్లేందుకు ఎదురుచూస్తున్న తరుణంలో ఈ ప్రమాదం జరిగింది. వెంటనే ఆయన్ను ఆసుపత్రికి తరలించారు. భుజం వద్ద ఫ్రాక్చర్‌ అయినట్లు గుర్తించిన వైద్యులు ఆ ప్రాంతంలో కట్టు కట్టి ఇంటికి పంపించారు.