యూపీలో విషపూరిత గ్రాసం తిని 60 ఆవుల మృతి

ఈనాడు, లఖ్‌నవూ: ఉత్తర్‌ప్రదేశ్‌లోని అమ్రోహా జిల్లాలో పెద్ద సంఖ్యలో ఆవులు మృతిచెందిన ఘటన కలకలం రేపింది. ఈ వ్యవహారాన్ని తీవ్రంగా పరిగణించిన ముఖ్యమంత్రి యోగి ఆదిత్యనాథ్‌ విచారణకు ఆదేశించారు. పశుసంవర్థక శాఖ మంత్రి వెంటనే సంఘటన స్థలానికి చేరుకున్నారు. ఘటనపై విచారణ జరిపి నివేదిక సమర్పించాలని ముఖ్య కార్యదర్శి, లైవ్‌స్టాక్‌ డైరెక్టర్‌, మొరాదాబాద్‌ కమిషనర్‌ను ఆదేశించారు. అధికారులు తెలిపిన సమాచారం ప్రకారం.. అమ్రోహా జిల్లా సంతల్‌పుర్‌ గోశాలలో మొత్తం 188 ఆవులు ఉన్నాయి. బుధవారం కొందరు కూలీలు తోటలోని మేత కోసి గ్రాసంగా వేయడంతో గురువారం ఉదయం నుంచి వాటికి అస్వస్థత మొదలైంది. మధ్యాహ్నం ఒక ఆవు చనిపోగా.. ఆ తర్వాత వాటి మరణాల ప్రక్రియ ప్రారంభమైంది. ఇలా కొన్ని గంటల్లోనే 55 ఆవులు మృతి చెందాయి. ఇప్పుడు వాటి సంఖ్య 60కి చేరింది. ఈ ఘటనకు సంబంధించి పోలీసులు ఏడుగురిని అదుపులోకి తీసుకుని విచారణ ప్రారంభించారు. ఉన్నతాధికారుల ఆదేశాల మేరకు జిల్లా యంత్రాంగం రంగంలోకి దిగింది. నిర్లక్ష్యంగా వ్యవహరించిన వీడీవోను డీఎం సస్పెండ్‌ చేశారు. వివిధ శాఖల ఉన్నతాధికారులందరూ గోశాల వద్దకు చేరుకున్నారు.