‘అగ్నిపథ్‌’కు వ్యతిరేకంగా ఎస్‌కేఎం ప్రచారోద్యమం

దిల్లీ: కేంద్ర ప్రభుత్వం ప్రవేశపెట్టిన అగ్నిపథ్‌ పథకానికి వ్యతిరేకంగా ఈనెల 7వ తేదీన దేశవ్యాప్త ప్రచారోద్యమాన్ని ప్రారంభించనున్నట్లు రైతు సంఘాలకు చెందిన సంయుక్త్‌ కిసాన్‌ మోర్చా (ఎస్‌కేఎం) శనివారం వెల్లడించింది. సైనిక దళాల్లోకి తమ యువతను పంపుతున్న రైతు కుటుంబాలకు ఈ పథకం పెద్దదెబ్బ అని పేర్కొంది. మాజీ సైనికోద్యోగుల యునైటెడ్‌ ఫ్రంట్‌తో పాటు వివిధ యువజన సంఘాలతో కలిసి ఈ కార్యక్రమాన్ని చేపడుతున్నట్లు ఎస్‌కేఎం ఓ ప్రకటనలో తెలిపింది. సైన్యంలో ఖాళీగా ఉన్న పోస్టులను పాత విధానంలోనే భర్తీ చేయాలని ఈ సందర్భంగా డిమాండ్‌ చేయనున్నట్లు పేర్కొంది. ఈ ప్రచారోద్యమంలో తొలి అడుగుగా ఈనెల 7 నుంచి 14 వరకు ‘జై జవాన్‌.. జై కిసాన్‌’ సదస్సులను నిర్వహిస్తున్నట్లు స్వరాజ్‌ ఇండియా అధ్యక్షుడు యోగేంద్ర యాదవ్‌ తెలిపారు. వివిధ ప్రాంతాల్లో కార్యక్రమాలను చేపడుతున్నట్లు వెల్లడించారు.