రద్దైన ‘సీయూఈటీ-యూజీ’ పరీక్షల షెడ్యూల్‌ వాయిదా

ఆగస్టు 24-28 మధ్య నిర్వహిస్తామని ఎన్‌టీఏ ప్రకటన

దిల్లీ: సాంకేతిక, ఇతర కారణాలతో గత వారం జరిగిన ‘ఉమ్మడి విశ్వవిద్యాలయ ప్రవేశ పరీక్ష (సీయూఈటీ)-యూజీ’ను రాయలేని విద్యార్థుల కోసం నేషనల్‌ టెస్టింగ్‌ ఏజెన్సీ (ఎన్‌టీఏ) కొత్త షెడ్యూల్‌ ప్రకటించింది. ఈ నెల 24-28 తేదీల్లో పరీక్ష నిర్వహిస్తామని పేర్కొంది. అడ్మిట్‌ కార్డులను పరీక్షకు ముందు జారీ చేస్తామని తెలిపింది. ‘‘రెండో దశలో షెడ్యూల్‌ ప్రకారం ఆగస్టు 4 నుంచి 6 మధ్య పరీక్ష నిర్వహించాం. సాంకేతిక, పరిపాలన కారణాలతో కొన్ని కేంద్రాల్లో పరీక్ష వాయిదా పడింది. దీంతో ఆగస్టు 12 నుంచి 14 మధ్య జరుపుతామని ఇంతకుముందు పేర్కొన్నాం. అయితే ఈ తేదీల్లో పండుగలు ఉన్నాయని, అనుకూలం లేవని చాలా మంది విద్యార్థులు విజ్ఞప్తి చేయడంతో తాజా తేదీలను ప్రకటించాం’’ అని ఎన్‌టీఏ అధికారులు తెలిపారు. మరోవైపు కొన్ని కేంద్రాల్లో సీయూఈటీ-యూజీ పరీక్ష నిర్వహణ విషయంలో తీవ్ర అవకతవకలు చోటు చేసుకున్నాయని యూనివర్సిటీ గ్రాంట్స్‌ కమిషన్‌ ఛైర్మన్‌ ఎం.జగదీశ్‌కుమార్‌ తెలిపారు. విద్యార్థుల ప్రయోజనాలను దృష్టిలో ఉంచుకొని ఆ కేంద్రాల్లో పరీక్షలు రద్దు చేశామని ఆదివారం పేర్కొన్నారు.