స్పైస్‌జెట్‌ విమాన ప్రయాణికుల నడకబాట

టెర్మినల్‌కు చేరేందుకు బస్సులు లేకపోవడంతో..

దిల్లీ: విమానం దిగిన తర్వాత టెర్మినల్‌కు చేరుకునేందుకు బస్సులు అందుబాటులో లేకపోవడంతో ప్రయాణికులు నడకబాట పట్టిన ఘటన దిల్లీలో చోటుచేసుకుంది. స్పైస్‌జెట్‌ విమానమొకటి హైదరాబాద్‌ నుంచి 186 మంది ప్రయాణికులతో శనివారం రాత్రి దాదాపు 11:24 గంటలకు దిల్లీ చేరుకుంది. విమానం ల్యాండ్‌ అయిన దగ్గరి నుంచి ప్రయాణికులు టెర్మినల్‌కు చేరుకునేందుకు ఆ సమయంలో ఒకే ఒక్క బస్సు అందుబాటులో ఉంది. మిగిలినవారు దాదాపు 45 నిమిషాల పాటు వేచి ఉన్నా వేరే బస్సులేవీ రాలేదు. దీంతో వారిలో చాలామంది టెర్మినల్‌ వైపు నడకబాట పట్టాల్సి వచ్చింది. ఈ ఘటనపై స్పైస్‌జెట్‌ స్పందిస్తూ.. బస్సుల రాక కొంత ఆలస్యమైన మాట వాస్తమేనని పేర్కొంది. అయితే నడక ప్రారంభించిన ప్రయాణికులు సహా అందరినీ తాము తిరిగి బస్సులో ఎక్కించుకొని టెర్మినల్‌కు చేర్చినట్లు వెల్లడించింది. ఈ ఘటనపై దర్యాప్తు ప్రారంభించినట్లు పౌర విమానాయాన డైరెక్టరేట్‌ జనరల్‌ (డీజీసీఏ) తెలిపింది.