Viral news: మహిళపై అసభ్యంగా ప్రవర్తించిన భాజపా నేత ఇంటిపైకి బుల్డోజర్‌

ఈనాడు, లఖ్‌నవూ: మహిళపై అనుచితంగా ప్రవర్తించిన భాజపా నేతకు సంబంధించిన ఓ వీడియో సామాజిక మాధ్యమాల్లో వైరలవ్వడంతో ఉత్తర్‌ప్రదేశ్‌ ప్రభుత్వం రంగంలోకి దిగి.. కేసు నమోదు చేసింది. ఈ ఘటనలో నిర్లక్ష్యంగా వ్యవహరించిన ఆరుగురు పోలీసులను సస్పెండ్‌ చేసింది. నోయిడాలోని  గ్రాండ్‌ ఓమాక్స్‌ సొసైటీలో నివాసముంటున్న భాజపా నేత శ్రీకాంత్‌ త్యాగి సొసైటీలో అక్రమనిర్మాణాలు చేపట్టారు. సొసైటీ అనుమతి లేకుండా, తన ఇంటి ముందు మొక్కలు కూడా నాటారు. దీనిపై ప్రశ్నించిన ఓ మహిళను పరుష పదజాలంతో దూషించారు. ఈ వీడియో వైరల్‌ కావడంతో పోలీసులు త్యాగిపై కేసు నమోదు చేశారు. త్యాగీకి మద్దతుగా నిలిచిన ఆరుగురిని అదుపులోకి తీసుకున్నారు. ఈ క్రమంలో నోయిడా అథారిటీ బృందం రంగంలోకి దిగి సొసైటీలో త్యాగి తన ఫ్లాట్‌కు అనుబంధంగా నిర్మించిన అక్రమ నిర్మాణాన్ని బుల్డోజర్‌తో కూల్చివేసింది.