న్యాయవాదులను క్రమశిక్షణలో ఉంచేందుకే జరిమానాలు

ఈ విషయంలో సుప్రీంకోర్టు జోక్యం వద్దు: జస్టిస్‌ చంద్రచూడ్‌

దిల్లీ: గాడి తప్పిన న్యాయవాదులను క్రమశిక్షణలో పెట్టేందుకే హైకోర్టులు జరిమానాలు విధిస్తాయని, ఈ విషయంలో సుప్రీంకోర్టు జోక్యం చేసుకోకుండా ఉండటమే ఉత్తమమని న్యాయమూర్తులు జస్టిస్‌ డి.వై.చంద్రచూడ్‌, జస్టిస్‌ ఎ.ఎస్‌.బోపన్న ధర్మాసనం సోమవారం పేర్కొంది. రాజస్థాన్‌ హైకోర్టు తనకు విధించిన రూ.50 వేల జరిమానాను రద్దు చేయాలని కోరుతూ ఓ న్యాయవాది వేసిన పిటిషన్‌ను కొట్టివేస్తూ.. ధర్మాసనం ఈ వ్యాఖ్యలు చేసింది. న్యాయమూర్తులపై కొందరు న్యాయవాదులు నిరాధారమైన ఆరోపణలు చేస్తారని, దీనికి అడ్డుకట్ట వేసి కోర్టు గదుల్లో క్రమశిక్షణ నెలకొల్పడానికే హైకోర్టులు జరిమానాలు వేస్తాయని తెలిపింది. ‘‘ఈ విషయంలో సుప్రీంకోర్టు జోక్యం చేసుకోకూడదు. ఒకవేళ చేసుకుంటే కోర్టు గదుల్లో క్రమశిక్షణపై హైకోర్టులు నియంత్రణ కోల్పోతాయి’’ అని జస్టిస్‌ చంద్రచూడ్‌ పేర్కొన్నారు.