పట్టణప్రాంత పీఎంఏవై 2024 వరకు పొడిగింపు

కేంద్ర కేబినెట్‌ నిర్ణయం

దిల్లీ: పట్టణ ప్రాంతాల్లో ‘ప్రధానమంత్రి ఆవాస్‌ యోజన’ (పీఎంఏవై)ను 2024 డిసెంబరు 31 వరకు కొనసాగించడానికి కేంద్ర మంత్రివర్గం నిర్ణయించింది. పట్టణాల్లో అర్హులైన వారందరికీ పక్కా ఇళ్లు కల్పించే ఉద్దేశంతో తీసుకువచ్చిన ఈ పథకం వాస్తవానికి ఈ ఏడాది మార్చిలోనే ముగిసిపోవాల్సి ఉంది. రాష్ట్రాల వినతి మేరకు దీనిని పొడిగించాలని ప్రధాని నరేంద్రమోదీ అధ్యక్షతన బుధవారం సమావేశమైన కేబినెట్‌ నిర్ణయం తీసుకుంది. ఈ ఏడాది మార్చి 31 వరకు మంజూరైన 122.69 లక్షల ఇళ్లను పూర్తి చేయడానికి ఆర్థిక సాయాన్ని ప్రభుత్వం అందిస్తుంది. గృహ నిర్మాణంపై 2004-14 మధ్య రూ.20,000 కోట్లు ఖర్చయితే, 2015 నుంచి ఇప్పటివరకు రూ.2.03 లక్షల కోట్లకు ఆమోదం తెలిపి ఇప్పటికే రూ.1.18 లక్షల కోట్లు విడుదల చేశామని కేంద్రం తెలిపింది.