28న నోయిడా ట్విన్‌టవర్స్‌ కూల్చివేత

తేదీ ఖరారు చేసిన సుప్రీం కోర్టు

దిల్లీ: ఉత్తర్‌ప్రదేశ్‌లోని నోయిడాలో అక్రమంగా నిర్మించిన 40 అంతస్తుల ట్విన్‌టవర్స్‌ను కూల్చివేసే తేదీని సుప్రీంకోర్టు కాస్త పొడిగించింది. ఈ నెల 21న కూల్చివేయాలని గత ఉత్తర్వుల్లో పేర్కొంది. అయితే శుక్రవారం ఈ తేదీని ఆగస్టు 28గా ఖరారు చేసింది. సాంకేతిక, ఇతర కారణాలతో అడ్డంకులు ఏర్పడితే సెప్టెంబరు 4 వరకు గడువు తీసుకోవచ్చని అధికారులకు సూచించింది. నోయిడాలోని సెక్టార్‌ 93లో సూపర్‌టెక్‌ లిమిటెడ్‌ భారీ గృహ ప్రాజెక్టును 2009లో ప్రారంభించింది. ఇందులో నిర్మించిన ట్విన్‌టవర్స్‌.. నిబంధనలకు అనుగుణంగా లేవని తేలడంతో నిరుడు ఆగస్టు 31న వీటిని కూల్చివేయాల్సిందిగా సుప్రీంకోర్టు ఉత్తర్వులు జారీ చేసింది. ఇందులో ప్లాట్లు, దుకాణాలు కొనుగోలు చేసిన వారికి 12 శాతం వడ్డీతో నగదు తిరిగి చెల్లించాలని నిర్మాణసంస్థ సూపర్‌టెక్‌ లిమిటెడ్‌ను ఆదేశించింది.