రాఖీ పండుగకు వెళ్తూ నదిలో పడిన మహిళ

12 గంటల తర్వాత సురక్షితంగా బయటకు

భోపాల్‌: రాఖీ పండుగ కోసం సోదరుడితో పాటు పుట్టింటికి బయలు దేరిన ఓ మహిళ.. నదిలో పడిన 12 గంటల తర్వాత ప్రాణాలతో బయటపడ్డారు. మధ్యప్రదేశ్‌లోని విదిశా జిల్లాలో ఈ ఘటన జరిగింది. రక్షాబంధన్‌ జరుపుకొనేందుకు డాంగి(35) అనే మహిళ గురువారం సాయంత్రం తన సోదరుడితో కలిసి బైకుపై పడారియాలోని తల్లిదండ్రుల వద్దకు బయలుదేరారు. బరిఘాట్‌ వంతెన దాటుతుండగా  వీరి వాహనం ఉబ్బినా బెత్వా నదిలో పడిపోయింది. ప్రవాహం అధికంగా ఉండటంతో 5 కిలోమీటర్ల దూరం కొట్టుకుపోయిన డాంగి.. నిర్మాణంలో ఉన్న వంతెన ఇనుప చువ్వలను ఆసరాగా పట్టుకుని ఉండిపోయారు. ‘‘నా కుమారుడి కోసం ఎలాగైనా ప్రాణాలతో బయటపడాలని నిశ్చయించుకున్నాను. అందుకే ఉరుములు, మెరుపులతో వర్షం కురుస్తున్నా.. రాత్రంతా వరదలోనే ఉండిపోయాను. ఉదయం అక్కడికి చేరుకున్న సహాయక బృందాలు తనను రక్షించే క్రమంలో పడవ బోల్తా పడింది. మళ్లీ కొంత దూరం కొట్టుకుపోయాను. లైఫ్‌ జాకెట్‌ ఉండటంతో ప్రాణాలతో బయటపడ్డాను’ అని డాంగి వివరించారు. చివరకు తన సోదరుడికి రాఖీ కట్టానని డాంగి తెలిపారు.