చైనా మాంజా గొంతుకు చుట్టుకొని వ్యక్తి మృతి

దిల్లీ: చైనా మాంజా గొంతుకు చుట్టుకొని ఓ వ్యక్తి ప్రాణాలు కోల్పోయాడు. ఈశాన్య దిల్లీలోని శాస్త్రీ పార్క్‌ సమీపంలో ఈ ఘటన చోటుచేసుకుంది. ముండ్కాలోని రాజధాని పార్క్‌లో నివాసం ఉంటున్న విపిన్‌ కుమార్‌(34), తన భార్య, కుమార్తెతో కలిసి రక్షా బంధన్‌ జరుపుకొనేందుకు ద్విచక్రవాహనంపై గురువారం సాయంత్రం తన అత్తమామల ఇంటికి బయలుదేరాడు. ఐఎస్‌బీటీ-సీలంపుర్‌ రహదారిలో ఉన్న పై వంతెన సమీపంలోకి రాగానే విపిన్‌ కుమార్‌ మెడకు గాలిపటానికి ఉన్న మాంజా చుట్టుకొని గొంతుకు తీవ్ర గాయమైంది. సమీపంలోని ఆసుపత్రికి తరలించగా అక్కడ ప్రాణాలు కోల్పోయినట్లు పోలీసులు తెలిపారు.