రోదసి నుంచి అమృతోత్సవ శుభాకాంక్షలు

దిల్లీ: స్వాతంత్య్ర అమృతోత్సవాలను జరుపుకొంటున్న భారత్‌కు నింగి నుంచీ శుభాకాంక్షలు వస్తున్నాయి. తాజాగా అంతర్జాతీయ అంతరిక్ష కేంద్రం (ఐఎస్‌ఎస్‌)లో ఉన్న ఇటలీ వ్యోమగామి సమంతా క్రిస్టోఫొరెట్టి వీడియో ద్వారా సందేశాన్ని తెలియజేశారు. ‘‘75 ఏళ్ల స్వతంత్ర భారత్‌కు శుభాకాంక్షలు చెప్పడం ఆనందానిస్తోంది. దశాబ్దాలుగా ఎన్నో రోదసి ప్రయోగాల్లో అంతర్జాతీయ సంస్థలు భారత అంతరిక్ష పరిశోధన సంస్థ (ఇస్రో)తో కలిసి పనిచేస్తున్నాయి. అమెరికా, భారత్‌లు సంయుక్తంగా ప్రయోగించబోయే ‘నిసార్‌’ ఉపగ్రహం ద్వారా విపత్తుల గురించి నిశితంగా శోధించడానికి వీలవుతుంది’’ అని ఆమె పేర్కొన్నారు. సమంత సందేశానికి ఇస్రో కృతజ్ఞతలు తెలిపింది.