ఈ ఏడాది రికార్డుస్థాయిలో హైకోర్టు న్యాయమూర్తుల నియామకం

ఇప్పటి వరకు 138 మంది నియమాకానికి ఆమోదముద్ర

ఈనాడు, దిల్లీ: ఈ ఏడాది రికార్డు స్థాయిలో హైకోర్టు న్యాయమూర్తులను నియమించినట్లు కేంద్ర న్యాయ శాఖ ఒక ప్రకటనలో తెలిపింది. 2022 సంవత్సరంలో ఇప్పటివరకు 138 మందిని నియమించి 2016లో నమోదైన 126 మంది నియామక రికార్డును అధిగమించినట్లు పేర్కొంది. 2021లో 120 మంది హైకోర్టు, 9 మంది సుప్రీంకోర్టు న్యాయమూర్తులను నియమించినట్లు వెల్లడించింది. ఉన్నత న్యాయస్థానాల్లో న్యాయమూర్తుల నియామక ప్రక్రియను వేగవంతం చేసినట్లు పేర్కొంది. శుక్రవారం ఆరు హైకోర్టులకు 26 మందిని, తాజాగా పంజాబ్‌-హరియాణా హైకోర్టుకు 11 మంది న్యాయమూర్తుల నియామకంతో రెండు రోజుల్లో 37 మంది కొత్త న్యాయమూర్తులను నియమించినట్లయిందని న్యాయశాఖ వివరించింది.