దోషుల్లో కొందరు సంస్కారవంతులైన బ్రాహ్మణులు

గుజరాత్‌ భాజపా ఎమ్మెల్యే వ్యాఖ్య

అహ్మదాబాద్‌: బిల్కిస్‌ బానో సామూహిక అత్యాచార కేసులో శిక్షపడిన దోషుల్లో కొందరు ‘సంస్కారవంతులైన బ్రాహ్మణులు’ ఉన్నారనీ, వారి కుటుంబాల గత కార్యకలాపాల కారణంగా కేసులో ఇరికించి ఉంటారని గోధ్రా నియోజకవర్గ భాజపా ఎమ్మెల్యే సికె.రౌల్జీ పేర్కొన్నారు. దోషులు 11 మందిని జైలు నుంచి విడుదల చేయాలని సిఫార్సు చేసిన ప్రభుత్వ కమిటీలో ఆయనొకరు. 15 ఏళ్లుగా జైల్లో గడిపి విడుదలైనవారు నేరంలో పాల్గొన్నారో లేదో తనకు తెలియదని రౌల్జీ చెప్పారు. కారాగారంలో వారి ప్రవర్తన ఎలా ఉందనేది జైలర్‌ నుంచి తెలుసుకుని, విడుదలకు సిఫార్సు చేశామనీ, సుప్రీంకోర్టు ఆదేశాల మేరకే వ్యవహరించామని ఒక పోర్టల్‌కు ఇచ్చిన ఇంటర్వ్యూలో చెప్పారు.