అనాయాస మరణం ఆపాలన్న పిటిషన్‌ ఉపసంహరణ

దిల్లీ: దీర్ఘకాల నరాల రుగ్మతతో బాధపడుతున్న తన స్నేహితుడు అనాయాస మరణం పొందేందుకు వైద్యచికిత్స పేరిట స్విట్జర్‌లాండ్‌ వెళ్లేందుకు చేస్తున్న ప్రయత్నాన్ని అడ్డుకోవాలంటూ ఓ మహిళ (49) దిల్లీ హైకోర్టులో వేసిన పిటిషన్‌ను గురువారం ఉపసంహరించుకున్నారు. పిటిషనరు తరఫు న్యాయవాది.. జస్టిస్‌ యశ్వంత్‌వర్మకు ఈ విషయం నివేదిస్తూ ‘గత వారం ఈ పిటిషను దాఖలు చేసిన సమయానికి ఆమె సందిగ్ధంలో ఉన్నారు. ఉపసంహరించుకోవాలని ఇపుడు కోరుతున్నారు’ అని తెలిపారు. ‘మియాల్జిక్‌ ఎన్‌సెఫలోమైయెలిటిస్‌ వ్యాధితో బాధపడుతున్న నా స్నేహితుడు పిటిషను గురించి తెలిసి చాలా ఆవేదనకు గురయ్యారు. ఇది ఇలాగే కొనసాగితే ఆ రిట్‌ను దాఖలు చేయడంలోని ఉద్దేశమే వ్యర్థం కావచ్చని భయపడుతున్నా’ అంటూ ఆమె ప్రకటనను న్యాయవాది చదివి వినిపించారు. దీంతో కోర్టు పిటిషను ఉపసంహరణకు అనుమతించింది.