చోరీల్లో శతక రాణి అరెస్టు

గాజియాబాద్‌: పని మనిషిగా ఇంటిలో చేరుతుంది. యజమానుల కన్నుగప్పి చేతివాటం ప్రదర్శిస్తుంది. డబ్బు, బంగారు నగలతో విమానంలో ఉడాయిస్తుంది. ఇలా దిల్లీ, కోల్‌కతా, జోధ్‌పుర్‌ తదితర నగరాల్లో వందకు పైగా ఇళ్లలో చోరీలకు పాల్పడిన పూనం షా అలియాస్‌ కాజల్‌ అనే మహిళను ఉత్తర్‌ప్రదేశ్‌ గాజియాబాద్‌ పోలీసులు అరెస్టు చేశారు. ఒక్క దిల్లీలోనే ఆమె మీద 26 కేసులున్నాయని వారు చెప్పారు. చోరీ సొమ్ముతో దిల్లీలో స్థలం కొని ఇల్లు నిర్మించుకున్నట్లు తేలిందన్నారు. బిహార్‌కు చెందిన పూనం.. గాజియాబాద్‌లోని యజమాని ఇంట్లో రూ.10 లక్షల విలువైన బంగారు నగలను చోరీ చేసిన కేసులో విచారణ చేపట్టగా, ఆమె నేర చరిత్ర వెలుగలోకి వచ్చిందని పోలీసులు పేర్కొన్నారు.