శృంగారానికి పురుషుడి అవసరం లేదు

తనను తాను పెళ్లాడిన టీవీ నటి కనిష్కా సోని

ముంబయి: ‘దియా ఔర్‌ బాతి హమ్‌’ టీవీ షోతో ప్రాచుర్యం పొంది, కొన్ని సినిమాల్లోనూ నటించిన కనిష్కా సోని తనను తానే పెళ్లాడినట్లు ఇన్‌స్టాగ్రాం ద్వారా చేసిన ప్రకటనపై విమర్శలు వెల్లువెత్తుతున్నాయి. పాపిట సిందూరం, మెడలో మంగళసూత్రాలతో ఉన్న తన చిత్రాలను కూడా షేర్‌ చేసిన ఆమె ఎందుకిలా చేయాల్సి వచ్చిందో వివరణ ఇస్తూ ఓ వీడియో విడుదల చేశారు. ‘విజ్ఞానం, సాంకేతికత ఎంతో ప్రగతి సాధించాయి. ఓ మహిళ శృంగారానికి పురుషుడితో ఇక పని లేదు. నేను గుజరాత్‌కు చెందిన చాలా సంప్రదాయవాద కుటుంబం నుంచి వచ్చాను. పెళ్లి అనేది నా చిరకాల వాంఛ. కానీ, మాట మీద నిలబడే పురుషుడు ఎవరినీ నా జీవితంలో చూడలేదు. అందుకే పురుషుడు లేకుండానే జీవితం గడపాలన్న నిర్ణయానికి వచ్చాను. నా కలలు, అవసరాలు నేనే తీర్చుకోగలను. ‘మహాబలి హనుమాన్‌’ వంటి షోలలో నేను దేవతల వంటి పాత్రలు పోషించాను. ఎవరూ పెద్దగా గుర్తించలేదు. ఈరోజు నా ఇన్‌స్టాగ్రాం చూసి ఎంతోమంది స్పందిస్తున్నారు. వివాహిత మహిళల్లో 90 శాతం మంది సంతోషంగా లేరన్నదే నా అభిప్రాయం’ అని కనిష్కా సోని వివరించారు.