Income tax: ఆర్జన రోజుకు రూ.500.. ఆదాయపు పన్ను రూ.37.5 లక్షలు

కూలి పనులు చేస్తూ రోజుకు రూ.500 సంపాదించే ఓ వ్యక్తికి ఆదాయపు పన్ను శాఖ నుంచి నోటీసులు అందాయి. బిహార్‌లోని ఖగాఢియా జిల్లా మఘౌనా గ్రామానికి చెందిన గిరీశ్‌ యాదవ్‌ను.. ‘‘మీ పేరున బకాయి పడిన రూ. 37.5 లక్షల ఆదాయపు పన్నును వెంటనే చెల్లించాలి’’ అని ఐటీ శాఖ నోటీసు జారీ చేసింది. దాన్ని చూసిన గిరీశ్‌ ఒక్కసారిగా ఆశ్చర్యానికి గురయ్యాడు. వెంటనే దగ్గర్లో ఉన్న అలౌలి పోలీస్‌స్టేషన్‌లో ఫిర్యాదు చేశాడు. దీనిపై కేసు నమోదు చేసినట్లు స్టేషన్‌హౌస్‌ అధికారి పురేంద్ర కుమార్‌ తెలిపారు. ఫిర్యాదుదారుడి పేరుతో ఉన్న పాన్‌ నంబరు ద్వారా నోటీసు జారీ అయిందన్నారు.  ‘‘గిరీశ్‌ ఉపాధి కోసం దిల్లీలో చిన్నచిన్న పనులు చేస్తుంటానని చెప్పాడు. అక్కడే పాన్‌ కార్డు కోసం గతంలో ఓ మధ్యవర్తిని సంప్రదించాడు. ఆ తర్వాత మధ్యవర్తి ఎప్పుడూ తనను కలవలేదని చెప్పాడు. రాజస్థాన్‌లో ఉన్న ఓ కంపెనీతో గిరీశ్‌కు సంబంధం ఉన్నట్లుగా ఐటీ శాఖ నోటీసుల్లో ఉంది’’ అని వెల్లడించారు.