నీట్‌-పీజీ కౌన్సెలింగ్‌ వాయిదా

సెప్టెంబరు మూడో వారంలో జరిగే అవకాశం!

దిల్లీ: పోస్టు గ్రాడ్యుయేట్‌ వైద్య కోర్సుల్లో ప్రవేశం కోసం వచ్చే నెల 1 నుంచి జరగాల్సిన నీట్‌-పీజీ కౌన్సెలింగ్‌ వాయిదా పడింది. నేషనల్‌ మెడికల్‌ కమిషన్‌ (ఎన్‌ఎంసీ) మరిన్ని కొత్త సీట్లకు అనుమతి ఇచ్చే అవకాశం ఉన్నందున ఈ నిర్ణయం తీసుకున్నట్లు కేంద్ర ఆరోగ్య మంత్రిత్వశాఖ సోమవారం ఒక ప్రకటనలో పేర్కొంది. కొత్త షెడ్యూల్‌ను ప్రకటించనప్పటికీ, సెప్టెంబర్‌ మూడో వారంలో కౌన్సెలింగ్‌ ప్రారంభమయ్యే అవకాశాలున్నాయని అధికార వర్గాలు చెబుతున్నాయి. ‘‘నీట్‌-పీజీ 2022 కౌన్సెలింగ్‌ సెప్టెంబరు ఒకటి నుంచి ప్రారంభం కావాల్సి ఉంది. కానీ ప్రస్తుత విద్యాసంవత్సరానికి ఎన్‌ఎంసీ కొత్త అనుమతి పత్రాలు జారీ చేయనుంది. ఈ ప్రక్రియ సెప్టెంబర్‌ 15తో ముగియనుంది. మరిన్ని సీట్లు కౌన్సెలింగ్‌లో చేరితే అభ్యర్థులుకు ప్రయోజనం కలుగుతుంది. అందుకే వాయిదా నిర్ణయం తీసుకున్నాం’’ అని మంత్రిత్వశాఖ పేర్కొంది.