క్యూట్‌-యూజీ ఫలితాలు విడుదల

మార్కుల సాధారణీకరణ విధానంలో మూల్యాంకనం: ఎన్‌టీఏ

దాని ఆధారంగానే వర్సిటీలు ర్యాంకుల జాబితా రూపొందించాలి: యూజీసీ

దిల్లీ: ఉమ్మడి విశ్వవిద్యాలయ ప్రవేశ పరీక్ష(క్యూట్‌)-యూజీ ఫలితాలను జాతీయ పరీక్షల మండలి (ఎన్‌టీఏ) శుక్రవారం విడుదల చేసింది. మొత్తంగా ఆరు దశల్లో జరిగిన ఈ పరీక్షలకు దాదాపు 14.9లక్షల మందికి పైగా నమోదు చేసుకున్నారు. వీరిలో 60 శాతం మంది పరీక్షకు హాజరయ్యారు. పలు కేంద్ర విశ్వవిద్యాలయాలు, రాష్ట్ర వర్సిటీలు, డీమ్డ్‌ యూనివర్సిటీలు, ప్రైవేటు వర్సిటీల్లో గ్రాడ్యుయేషన్‌ కోర్సుల్లో ప్రవేశాల కోసం తొలిసారి ఈ పరీక్షను నిర్వహించారు. ఫలితాలను www.nta.ac.in, https://cuet.samarth.ac.in వెబ్‌సైట్ల ద్వారా తెలుసుకోవచ్చు. ఈ పరీక్షలో ‘సమాన శాతం(ఈక్వి-పర్సంటైల్‌)’ పద్ధతిని ఉపయోగించి మూల్యాంకనం చేసినట్లు ఎన్‌టీఏ పేర్కొంది. ఇందుకోసం అభ్యర్థుల వ్యక్తిగత మార్కులను కాకుండా, సాధారణీకరించిన(నార్మలైజ్డ్‌) మార్కులను పరిగణనలోకి తీసుకున్నట్లు తెలిపింది. కొన్ని కారణాల వల్ల క్యూట్‌-యూజీలో ఒక్కో సబ్జెక్టు పరీక్షను వివిధ షిప్టుల్లో నిర్వహించాల్సి వచ్చిందని, ఆయా షిఫ్టుల్లో వేర్వేరు ప్రశ్నపత్రాలు వినియోగించినందువల్ల అనివార్యంగా కొందరికి కఠినమైన ప్రశ్నలు వచ్చి ఉండవచ్చని, అలాంటి వారు నష్టపోకుండా ఉండేందుకే మార్కులను సాధారణీకరించినట్లు తెలిపింది. ఈ పద్ధతిలో ఆయా షిఫ్టుల్లో పరీక్ష రాసినవారికి వచ్చిన ఉమ్మడి పర్సంటైల్‌ను పరిగణనలోకి తీసుకున్నట్లు వివరించింది. క్యూట్‌-యూజీ స్కోరు కార్డు ఆధారంగా ఆయా వర్సిటీలు స్వయంగా మెరిట్‌ జాబితాలను సిద్ధం చేసుకుని కౌన్సెలింగ్‌ నిర్వహిస్తాయని ఎన్‌టీఏ తెలిపింది. సాధారణీకరించిన మార్కుల ఆధారంగానే ర్యాంకుల జాబితా రూపొందించాలని యూజీసీ ఛైర్మన్‌ జగదీశ్‌కుమార్‌ విశ్వవిద్యాలయాలను ఆదేశించారు.