ప్రచారానికి పోతే.. పరువు తుస్‌

విద్యార్థిని దుస్తులు విప్పించి ఉతికిన ఉపాధ్యాయుడు

శహడోల్‌ (మధ్యప్రదేశ్‌): ప్రచారం కోసమో.. మరే ప్రయోజనం ఆశించారో తెలియదు కానీ, మధ్యప్రదేశ్‌లోని శహడోల్‌ జిల్లా జైసింగ్‌ నగర్‌ ప్రభుత్వ పాఠశాల ఉపాధ్యాయుడి అత్యుత్సాహం ఇపుడు ఆయన మెడకు చుట్టుకుంటోంది. ఈ పాఠశాలలో అయిదో తరగతి చదువుతున్న గిరిజన విద్యార్థిని మాసిన యూనిఫాంతో రావడం ఆ టీచరు గమనించారు. విద్యార్థిని చేత దుస్తులు విప్పించి తానే శుభ్రంగా ఉతికారు. చాలాసేపు ఆ విద్యార్థిని అర్ధనగ్నంగా అలాగే నిలబడిపోయింది. ఆరిన దుస్తులు తొడుక్కున్నాక.. ఆమెను క్లాసులోకి పంపారు. ఈ సందర్భంగా ఫొటో తీయించిన ఉపాధ్యాయుడు ఆ చిత్రాన్ని విద్యాశాఖ గ్రూపులో స్వయంగా షేర్‌ చేసి పరిశుభ్రతకు తాను ఎంతో ప్రాధాన్యం ఇస్తానని అందులో చెప్పుకొచ్చారు. ఈ ఫొటో కాస్తా సామాజిక మాధ్యమాల్లోనూ వైరల్‌గా మారడంతో జిల్లా కలెక్టర్‌ వందనా వైద్య స్పందించారు. ఘటనపై విచారణ జరిపించి, కఠినచర్య తీసుకొంటామని ఆమె ప్రకటించారు.