సముద్ర గర్భ సొరంగానికి మళ్లీ బిడ్లు

దిల్లీ: దేశంలోనే మొట్టమొదటిసారిగా చేపట్టనున్న సముద్ర గర్భ సొరంగం నిర్మాణానికి మళ్లీ కదలిక వచ్చింది. ముంబయి-అహ్మదాబాద్‌ మధ్య నిర్మించనున్న హైస్పీడ్‌ రైలు కారిడార్‌లో భాగంగా ఉన్న ఈ పనులకు ‘నేషనల్‌ హైస్పీడ్‌ రైల్వే కార్పొరేషన్‌ లిమిటెడ్‌’ (ఎన్‌హెచ్‌ఎస్‌ఆర్‌సీఎల్‌) బిడ్లను ఆహ్వానించింది. కారిడార్‌లో భాగంగా 21 కిలోమీటర్ల మేర సొరంగాన్ని తవ్వనున్నారు. ఇందులో 7 కిలోమీటర్లు సముద్రగర్భంలో ఉంటుంది. మహారాష్ట్రలోని బంద్రా-కుర్లా కాంప్లెక్స్‌ మధ్య సాధారణ సొరంగాన్ని తవ్వాల్సి ఉండగా.. థానే జిల్లాలోని శిల్‌ఫాటా ప్రాంతంలో సముద్రంలో నిర్మించాల్సి ఉంది. 2019లో సొరంగం నిర్మాణానికి ఎన్‌హెచ్‌ఎస్‌ఆర్‌సీఎల్‌  తొలిసారిగా టెండర్లు ఆహ్వానించినా బిడ్డర్లెవరూ ఆసక్తి చూపలేదు. గత నవంబరులోనూ ఈ సొరంగ మార్గాల ఏర్పాటుకు మరోసారి బిడ్లను ఆహ్వానించింది. పరిపాలనాపరమైన కారణాలతో అవి కార్యరూపం దాల్చలేదు. హైస్పీడ్‌ రైలు కారిడార్‌ పనులను నాలుగేళ్లలోపు పూర్తిచేసి 2026లో తొలిదశ ప్రయోగపరీక్ష నిర్వహించేందుకు అధికారులు సిద్ధమవుతున్నారు.