అఫ్గాన్‌ నుంచి భారత్‌ చేరుకున్న 55 మంది సిక్కులు, హిందువులు

చండీగఢ్‌: తరతరాలుగా తాము నివాసం ఉంటున్న అఫ్గానిస్థాన్‌ నేలను విడిచి.. ఆదివారం 55 మంది సిక్కులు, హిందువులు దిల్లీ ఇందిరాగాంధీ అంతర్జాతీయ విమానాశ్రయంలో దిగారు. దీంతో ఇక పదుల సంఖ్యలో సిక్కులు, హిందువులు మాత్రమే ఆ దేశంలో మిగిలారు. గత ఏడాది ఆగస్టులో అఫ్గాన్‌లోని ప్రజాస్వామ్య ప్రభుత్వాన్ని కూలదోసి తాలిబన్లు అధికారం చేజిక్కించుకున్న తర్వాత చాలా మంది సిక్కులు, హిందువులు భారత్‌కు తరలివచ్చారు. జూన్‌లో కాబుల్‌లోని కార్తే పర్వాన్‌ గురుద్వారాపై ఉగ్రదాడి అనంతరం ఈ సంఖ్య మరింత పెరిగింది. ఆదివారం చేరుకున్న 55 మంది ప్రయాణ ఏర్పాట్లను శిరోమణి గురుద్వారా ప్రబంధక్‌ కమిటీ పర్యవేక్షించింది. వీరి కోసం కాబుల్‌నుంచి ప్రత్యేక విమానం ఏర్పాటు చేసింది. భారత ప్రభుత్వం ఈ-వీసాలు మంజూరు చేయడంతో వేగంగా స్పందించింది. అయితే వీరితో పాటు సిక్కుల పవిత్ర గ్రంథాలను భారత్‌కు తీసుకొచ్చేందుకు మాత్రం తాలిబన్లు అనుమతి  నిరాకరించారు.