క్యూయెట్‌ ఆధారంగా పీజీలో ప్రవేశాలు

అందుకు తగ్గ ఏర్పాట్లు చేసుకోవాలని వర్సిటీలకు యూజీసీ లేఖ

ఈనాడు, దిల్లీ: యూనివర్సిటీల్లో పీజీ కోర్సుల్లో ప్రవేశాల కోసం నిర్వహించిన కామన్‌ యూనివర్సిటీ ఎంట్రెన్స్‌ టెస్ట్‌ (క్యూయెట్‌)-2022 ఫలితాలు సోమవారం సాయంత్రం 4 గంటలకల్లా విడుదలయ్యే అవకాశం ఉన్నందున దాని ఆధారంగా ప్రవేశాలకు ఏర్పాట్లు చేసుకోవాలని విశ్వవిద్యాలయాల ఉపకులపతులకు యూజీసీ లేఖలు రాసింది. ‘‘యూజీసీ నిధులతో నడిచే కేంద్ర విశ్వవిద్యాలయాలు, క్యూయెట్‌లో భాగస్వాములైన రాష్ట్ర/ప్రైవేటు/ డీమ్డ్‌ యూనివర్సిటీల్లో 2022-23కు సంబంధించి పీజీ కోర్సుల్లో ప్రవేశానికి నేషనల్‌ టెస్టింగ్‌ ఏజెన్సీ ఉమ్మడి పరీక్ష నిర్వహించింది. సోమవారం సాయంత్రం 4 గంటలకల్లా ఆ ఫలితాలు విడుదల కానున్నాయి. వాటి ఆధారంగా ప్రవేశాల కల్పన కోసం వెబ్‌సైట్లు, వెబ్‌పోర్టళ్లు ఏర్పాటుచేసుకోండి. దానివల్ల సకాలంలో పీజీ ప్రవేశాలు నిర్వహించడానికి వీలవుతుంది’’ అని యూజీసీ ఈ లేఖలో వైస్‌ ఛాన్సలర్లకు సూచించింది.