రోజూ 10 లక్షల ఆయుష్మాన్‌ భారత్‌ కార్డుల పంపిణీ లక్ష్యం

కేంద్ర ఆరోగ్యశాఖ మంత్రి మన్‌సుఖ్‌ మాండవీయ వెల్లడి

దిల్లీ: రోజూ 10 లక్షల ఆయుష్మాన్‌ భారత్‌ కార్డులను పంపిణీ చేయాలని ప్రభుత్వం లక్ష్యంగా పెట్టుకుందని కేంద్ర ఆరోగ్యశాఖ మంత్రి మన్‌సుఖ్‌ మాండవీయ తెలిపారు. ఈ పథకం కింద 3.95 కోట్ల మంది ఆసుపత్రుల్లో చికిత్స పొందారని.. వారి వైద్య ఖర్చుల కోసం రూ.45,294 కోట్లు చెల్లించినట్లు వెల్లడించారు. ఆయుష్మాన్‌ భారత్‌ ప్రధానమంత్రి-జన్‌ ఆరోగ్య యోజన(ఏబీ పీఎం-జాయ్‌) ప్రారంభమై నాలుగేళ్లు పూర్తయిన సందర్భంగా నిర్వహించిన ‘ఆరోగ్య మంథన్‌-2022’ కార్యక్రమంలో మంత్రి మాట్లాడారు. ఆయుష్మాన్‌ భారత్‌ కార్డుల ద్వారా 19 కోట్ల మంది లబ్ధిపొందుతున్నారని తెలిపారు. ‘‘గతంలో రోజూ 1-1.5 లక్షల కార్డుల పంపిణీ జరిగేది. ఇప్పుడు 4-5 లక్షల కార్డుల పంపిణీ జరుగుతోంది. దీన్ని 10 లక్షలకు పెంచాలన్నదే లక్ష్యం’’ అని మంత్రి వెల్లడించారు. ‘ఆయుష్మాన్‌ భారత్‌ ఆరోగ్య మౌలిక సదుపాయాల మిషన్‌’ కింద దేశంలోని ప్రతి జిల్లాలో మౌలిక సదుపాయాల కోసం రూ.100 కోట్లు కేటాయించనున్నట్లు తెలిపారు. ఈ పథకం కింద 28,300పైగా ఆసుపత్రులు నమోదయ్యాయని.. ఇందులో 46 శాతం ప్రైవేటు ఆసుపత్రులని వివరించారు.