అంకితా భండారీ మృతదేహానికి అంత్యక్రియలు పూర్తి

దేహ్రాదూన్‌: ఉత్తరాఖండ్‌లో భాజపా నేత కుమారుడి చేతిలో హత్యకు గురైన 19 ఏళ్ల రిసెప్షనిస్టు అంకితా భండారీ హత్య కేసులో న్యాయం చేస్తామని సీఎం పుష్కర్‌సింగ్‌ ధామి హామీ ఇవ్వడంతో ఆదివారం ఎనిమిది గంటల పాటు రిషికేశ్‌-బద్రీనాథ్‌ జాతీయ రహదారిని దిగ్బంధనం చేసిన ఆందోళనకారులు శాంతించారు. తుది పోస్టుమార్టం నివేదిక వచ్చేవరకు మృతదేహానికి అంత్యక్రియలు నిర్వహించే ప్రసక్తే లేదన్న భండారీ కుటుంబసభ్యులూ తాజా హామీతో వెనక్కి తగ్గారు. సాయంత్రం అలకనంద నదీ తీరంలో అంత్యక్రియలు పూర్తి చేశారు. హరిద్వార్‌కు చెందిన భాజపా నేత వినోద్‌ ఆర్య కుమారుడు పులకిత్‌ ఆర్య నడుపుతున్న రిసార్టులో రిసెప్షనిస్టుగా పనిచేస్తున్న అంకిత ఈ నెల 18న అదృశ్యమయ్యారు. దీంతో ఆమె తల్లిదండ్రులు పోలీసులకు ఫిర్యాదు చేశారు. రిసార్టులోని మరో ఇద్దరు ఉద్యోగులతో కలిసి తానే అంకితను హత్య చేసి, చీలా కాలువలో పడేశానని నిందితుడు పులకిత్‌ ఆర్య శుక్రవారం అంగీకరించారు. రాజకీయంగానూ ఈ హత్య ఉత్తరాఖండ్‌లో ప్రకంపనలు సృష్టించింది. దీంతో భాజపా కూడా వినోద్‌ ఆర్యను, ఆయన మరో తనయుడిని పార్టీ నుంచి బహిష్కరించింది.