ఛత్తీస్‌గఢ్‌లో వైద్య బృందం అపహరణ.. విడుదల

దుమ్ముగూడెం, న్యూస్‌టుడే: ఛత్తీస్‌గఢ్‌ రాష్ట్రం బైరాంగఢ్‌ ప్రాంతంలోని ఇంద్రావతి నది తీరంలో ఉన్న ఓ గ్రామంలో మావోయిస్టులు సోమవారం వైద్య బృందాన్ని అపహరించారు. అనంతరం వైద్య సిబ్బంది వేడుకోవడంతో విడిచిపెట్టారు. ఇంద్రావతి నది తీర ప్రాంతంలో ఉన్న ఏడు గ్రామాల్లోని ఆదివాసీలకు అంతుచిక్కని వింత వ్యాధి సోకింది. ఈ వ్యాధితో బాధపడుతున్న వారికి వైద్య పరీక్షలు చేసేందుకు ఇద్దరు సర్పంచులతో కలిసి ఓ వైద్యాధికారి, 22 మంది వైద్య సిబ్బంది మోటారు బోటులో ఆయా గ్రామాలకు వెళ్లారు. ఈ క్రమంలో మావోయిస్టులు వీరిని అపహరించి బంధించారు. మోటారు బోటును స్వాధీనం చేసుకున్నారు. అనంతరం వైద్య బృందం బతిమిలాడటంతో సోమవారం సాయంత్రం వదిలేశారు.