‘గజగజ’లాడించాయి.. ఏనుగుల భయంతో గంటన్నర చెట్టుపైనే యువకుడు

ఇడుక్కి(కేరళ): ఎటువంటి కవ్వింపులకు పాల్పడకపోయినా ఓ ఏనుగుల మంద తనవైపు వస్తుండటంతో ఓ యువకుడు ఎత్తైన చెట్టెక్కి ప్రాణాలు దక్కించుకున్న ఘటన కేరళలో చోటుచేసుకుంది. ఇడుక్కికి చెందిన సాజి.. స్థానిక చిన్నకనల్‌ ప్రాంతంలో సంచరిస్తున్నాడు. అదే సమయంలో కొన్ని ఏనుగులు అతని వైపు పరుగులాంటి నడకతో రావడం మొదలుపెట్టాయి. దీంతో భయాందోళనకు గురైన అతడు వెంటనే దగ్గరలోని చెట్టెక్కేశాడు. ఆ ఏనుగులు అక్కడే ఘీంకరిస్తూ ఉండిపోయాయి.

దీంతో ఆ యువకుడు ప్రాణభయంతో చెట్టుపై నుంచే దగ్గరలోని స్థానికులను రక్షించాలంటూ వేడుకున్నాడు. విషయం తెలిసిన  అటవీశాఖ అధికారులు అక్కడకు చేరుకుని ఆ ఏనుగుల గుంపును తరిమేశారు. చివరకు సుమారు గంటన్నరపాటు చెట్టుపైనే ఉన్న సాజి బతుకు జీవుడా అనుకుంటూ కిందకి దిగాడు. ఈ విషయాన్ని ఆ యువకుడు మంగళవారం తెలిపాడు. దీనికి సంబంధించిన వీడియో ప్రస్తుతం సోషల్‌ మీడియాలో వైరల్‌గా మారింది.