సౌందర్య శస్త్రచికిత్సలను రిజిస్టర్డ్‌ వైద్యులే నిర్వహించాలి

 జాతీయ వైద్య కమిషన్‌ మార్గదర్శకాలు

దిల్లీ: హెయిర్‌ ట్రాన్స్‌ప్లాంట్‌ సహా సౌందర్య సంబంధ శస్త్రచికిత్సలను సరైన శిక్షణ పొందిన రిజిస్టర్డ్‌ వైద్య నిపుణులే నిర్వహించాలని జాతీయ వైద్య కమిషన్‌ (ఎన్‌ఎంసీ) పేర్కొంది. వర్క్‌షాప్‌లు లేదా యూట్యూబ్‌లో వీడియోలు వీక్షించడం ద్వారా ఇలాంటివాటిని ప్రయత్నించరాదని స్పష్టంచేసింది. ఈ మేరకు తాజాగా మార్గదర్శకాలు జారీ చేసింది. అందులోని ముఖ్యాంశాలవీ..

* సరిపడా మౌలిక వసతులు, ఏదైనా సమస్యలు ఎదురైతే ఎదుర్కోవడానికి అవసరమైన మానవ వనరులు ఉన్న కేంద్రాల్లోనే ఇలాంటి శస్త్రచికిత్సలను నిర్వహించాలి.

* ఈ తరహా ఆపరేషన్లు నిర్వహించే కేంద్రాలను డే కేర్‌ సెంటర్లు లేదా ఆసుపత్రులుగా రాష్ట్ర ప్రభుత్వం వద్ద నమోదు చేసుకోవాలి.

* వైద్య నేపథ్యమున్న నర్సులు, ఆపరేషన్‌ థియేటర్‌ టెక్నీషియన్లు, ఫార్మసిస్టులు మాత్రమే సహాయకులుగా ఉండాలి. రిజిస్టర్డ్‌ వైద్య నిపుణుల పర్యవేక్షణలో మాత్రమే వారు విధులు నిర్వహించాలి.

* ఫీజుల తగ్గింపు, తప్పుడు హామీలతో ప్రకటనలు ఇవ్వడం వంటివి చేయకూడదు. శస్త్రచికిత్స, దానివల్ల వచ్చే దుష్ప్రభావాల గురించి రోగికి ముందుగానే తెలియజేయాలి.

* హెయిర్‌ ట్రాన్స్‌ప్లాంట్‌ ప్రక్రియను శస్త్రచికిత్సల్లో శిక్షణ పొందిన ఎంసీహెచ్‌/డీఎన్‌బీ ప్లాస్టిక్‌ సర్జరీ, ఎండీ/డీఎన్‌బీ డెర్మటాలజీ నిపుణులు నిర్వహించాలి.