Harjot Kaur: ‘ఫ్రీ అంటే.. కండోమ్స్‌ కూడా కావాలంటారు’

రుతు రుమాళ్లు అడిగిన విద్యార్థినులతో బిహార్‌ ఐఏఎస్‌ అధికారిణి

పట్నా: ‘కోరికలకు ఓ అంతు అనేది ఉందా? ఈరోజు రుతు రుమాళ్లు (శానిటరీ నాప్‌కిన్స్‌) ఉచితంగా అడుగుతున్నారు. ఇలాగే ఇచ్చుకొంటూ పోతే.. చివరకు కుటుంబ నియంత్రణ మాటకొస్తే కండోమ్స్‌ కూడా ఉచితంగా అడుగుతారు’ అంటూ బిహార్‌ ఐఏఎస్‌ అధికారిణి హర్‌జోత్‌ కౌర్‌ చెప్పిన సమాధానం విని ఆ విద్యార్థినులు బిత్తరపోయారు. పాఠశాల విద్యార్థినులతో ఇక్కడ జరిగిన ఓ కార్యక్రమంలో బిహార్‌ ఉమెన్‌ డెవలప్‌మెంట్‌ కార్పొరేషన్‌ ఎండీ హర్‌జోత్‌ కౌర్‌ మాట్లాడుతుండగా.. ‘ప్రభుత్వం ఉచితంగా ఎన్నో ఇస్తోంది. 20 - 30 రూపాయల విలువ చేసే రుతు రుమాళ్లు మాకు ఇవ్వలేరా?’ అని ఓ విద్యార్థిని ప్రశ్నించింది. ఈ ప్రశ్నకు మహిళా ఉన్నతాధికారి పై విధంగా స్పందించారు. విద్యార్థినులు కూడా వెనక్కు తగ్గలేదు. ‘ఓట్ల కోసం వచ్చినపుడు ఎన్నో హామీలు ఇస్తారు కదా?’ అని నిలదీశారు. దీంతో హర్‌జోత్‌ కౌర్‌ ‘అయితే ఓట్లు వేయకండి. పాకిస్థాన్‌లా మారిపోండి’ అంటూ విద్యార్థులపై మండిపడ్డారు.