బ్రహ్మపుత్రలో పడవ బోల్తా.. ఏడుగురి గల్లంతు

ఈనాడు, గువాహటి: అస్సాంలోని ధుబ్రీ జిల్లాలో గురువారం ఉదయం బ్రహ్మపుత్ర నదిలో మర పడవ మునిగి ఏడుగురు గల్లంతయ్యారు. వీరిలో ప్రభుత్వ అధికారి కూడా ఒకరు ఉన్నారు. క్షేత్ర పరిశీలనకు వెళ్లిన అధికారులు, సిబ్బంది.. కొందరు స్థానికులు, విద్యార్థులు తిరుగు ప్రయాణంలో ఈ ప్రమాదంలో చిక్కుకున్నారు. చాలామంది ఈదుకొంటూ ఒడ్డుకు చేరగా, స్థానికులు కొందరిని రక్షించారు. మరో ఏడుగురి ఆచూకీ తెలియవలసి ఉందని అధికారులు చెప్పారు.  ప్రమాదం జరిగిన సమయంలో పడవలో మొత్తం 29 మంది ఉన్నారని, వంతెన స్తంభాన్ని ఢీకొని పడవ మునిగిపోయినట్లు అధికారులు తెలిపారు. ఎస్డీఆర్‌ఎఫ్‌ గజ ఈతగాళ్లు  గాలింపు చర్యలు చేపట్టారు.  ప్రమాదం నుంచి బయటపడినవారిలో అయిదుగురి పరిస్థితి విషమంగా ఉంది.