రాజస్థాన్‌లో శాంతి, అహింస శాఖ

కేబినెట్‌ ప్రతిపాదనకు గవర్నర్‌ ఆమోదం

జైపుర్‌: మహాత్మా గాంధీ సిద్ధాంతాలకు ప్రాచుర్యం కల్పించేందుకు రాజస్థాన్‌ ప్రభుత్వం శాంతి, అహింస శాఖను ఏర్పాటు చేసింది. ఈ మేరకు రాష్ట్ర క్యాబినెట్‌ చేసిన ప్రతిపాదనకు గవర్నర్‌ కల్‌రాజ్‌ మిశ్ర ఆమోదం తెలిపారు. ఈ శాఖను ఏర్పాటు చేయనున్నట్లు ముఖ్యమంత్రి అశోక్‌ గహ్లోత్‌ తన బడ్జెట్‌ ప్రసంగంలో ప్రకటించారు. ఇందుకు అనుగుణంగా మంత్రివర్గం ఇటీవల ఒక తీర్మానం చేసింది. గాంధీ సందేశాన్ని రాష్ట్రంలో అన్ని వర్గాలకూ చేరవేసి, పరస్పర సౌభ్రాతృత్వాన్ని పెంపొందించడమే ఈ శాఖ లక్ష్యం. ప్రధానంగా.. మహాత్ముడు ప్రబోధించిన సత్యం, అహింస సందేశాలను యువత, చిన్నారుల వద్దకు తీసుకెళుతుంది. ఈ దిశగా కార్యక్రమాలు చేపడుతుంది. కళలు, సాంస్కృతిక శాఖ ఆధ్వర్యంలో ఈ విభాగం పనిచేస్తుంది. దళితుల అభ్యున్నతి కోసం సామాజిక న్యాయశాఖతో కలిసి కార్యక్రమాలు నిర్వహిస్తుంది.