భారత గగనతలంలో ‘హైడ్రామా’

ఇరాన్‌ విమానంలో బాంబు ఉందంటూ బెదిరింపు

దాన్ని అనుసరించిన ఐఏఎఫ్‌ ఫైటర్‌ జెట్లు

చైనా వైపు వెళ్లిపోయిన విహంగం

దిల్లీ: భారత గగనతలంలో సోమవారం నాటకీయ పరిణామాలు చోటుచేసుకున్నాయి. మన గగనతలం మీదుగా ఎగురుతున్న ఇరాన్‌ విమానంలో బాంబు ఉన్నట్లు సమాచారం అందడంతో సోమవారం ఉదయం దిల్లీలోని ఇందిరా గాంధీ అంతర్జాతీయ విమానాశ్రయంలో కాసేపు కలకలం రేగింది. అధికారులు హుటాహుటిన ముందుజాగ్రత్త చర్యలు చేపట్టారు. ఫైటర్‌ జెట్లు, అగ్నిమాపక యంత్రాలను రంగంలోకి దించారు. టెహ్రాన్‌ నుంచి చైనాలోని గ్వాంఘ్జుకు వెళ్తున్న మహన్‌ ఎయిర్‌లైన్స్‌ విమానంలో బాంబు ఉన్నట్లు లాహోర్‌ ఎయిర్‌ ట్రాఫిక్‌ కంట్రోల్‌(ఏటీసీ) సిబ్బందికి బెదిరింపు కాల్‌ రావడంతో వారు దిల్లీ ఏటీసీకి సమాచారం ఇచ్చారు. ఈ నేపథ్యంలో ఆ విమానం దిల్లీ ఎయిర్‌పోర్టులో అత్యవసరంగా ల్యాండ్‌ కావొచ్చన్న సమాచారం మేరకు విమానాశ్రయ అధికారులు అగ్నిమాపక శాఖను అప్రమత్తం చేసి రెండు అగ్నిమాపక యంత్రాలను సిద్ధంగా ఉంచారు. భారత వైమానిక దళం (ఐఏఎఫ్‌) రంగంలోకి దించిన రెండు ఫైటర్‌ జెట్లు ఆ విమానాన్ని అనుసరించాయి. అయితే కాసేపటికే విమానం దిల్లీలో దిగడం లేదని తెలిసింది. దాన్ని జైపుర్‌ లేదా చండీగఢ్‌లో ల్యాండ్‌ చేయాలని అధికారులు పైలట్లకు సూచించారు. అయితే వారు అందుకు నిరాకరించి, భారత గగనతలం వదిలి చైనా గగనతలంలోకి వెళ్లిపోయారు. బాంబు బెదిరింపు ఉత్తిదే అని తేలడంతో అందరూ ఊపిరిపీల్చుకున్నారు.