పర్వతారోహకులపై హిమపంజా

ఉత్తరకాశీలో 10 మంది దుర్మరణం
24 మంది ఆచూకీ కోసం గాలింపు

ఉత్తరకాశీ: ఉత్తరాఖండ్‌ రాష్ట్రంలోని ఉత్తరకాశీ జిల్లాలో మంగళవారం భారీ హిమపాతంలో చిక్కి 10 మంది పర్వతారోహకులు దుర్మరణం చెందారు. ద్రౌపదీ కా డాండా - 2 పర్వత శిఖరంపై ఈ ప్రమాదం జరిగినట్లు అధికారులు తెలిపారు. నెహ్రూ ఇన్‌స్టిట్యూట్‌ ఆఫ్‌ మౌంటనీరింగ్‌ (ఎన్‌ఐఎం)కు చెందిన శిక్షకులు, శిక్షణ పొందుతున్న పర్వతారోహకులు మొత్తం 42 మందితో కూడిన బృందం కిందికి దిగుతున్న సమయంలో ఈ ప్రమాదంలో చిక్కుకొన్నట్లు ఎన్‌.ఐ.ఎం. ప్రిన్సిపల్‌ కల్నల్‌ అమిత్‌ బిష్త్‌ తెలిపారు. ఉదయం 8.45 గంటల ప్రాంతంలో జరిగిన ఈ దుర్ఘటనలో పదిమంది మృతిచెందగా, ఏడు మృతదేహాలను స్వాధీనం చేసుకొన్నట్లు ఉత్తరాఖండ్‌ డీజీపీ అశోక్‌కుమార్‌ వెల్లడించారు. ఈ బృందంలోని 8 మందిని తమ సిబ్బంది కాపాడినట్లు ఉత్తరకాశీ విపత్తుల నిర్వహణ అధికారి దేవేంద్ర పట్వాల్‌ తెలిపారు. ఇంకా 24 మంది ఆచూకీ తెలియాల్సి ఉంది. మొత్తం నాలుగు బృందాలు గాలింపు చర్యలు చేపట్టినట్లు ఉత్తరాఖండ్‌ ముఖ్యమంత్రి పుష్కర్‌సింగ్‌ ధామి ట్వీట్‌ చేశారు. రక్షణమంత్రి రాజ్‌నాథ్‌ సింగ్‌తో ఫోనులో మాట్లాడిన సీఎం సహాయక చర్యల్లో ఆర్మీ సాయం కోరారు. భూమికి 14 వేల అడుగుల ఎత్తులో పర్వతారోహకులు ప్రమాదానికి గురి కాగా.. మిగిలినవారి కోసం భారత వాయుసేనకు చెందిన రెండు చీతా హెలికాప్టర్లతో గాలింపు చర్యలు కొనసాగుతున్నాయి. భారీగా కురుస్తున్న మంచుతో ఈ చర్యలకు ఆటంకాలు ఎదురవుతున్నాయి. ఈ దుర్ఘటనపై ప్రధాని నరేంద్ర మోదీ, కేంద్ర హోం మంత్రి అమిత్‌ షా తీవ్ర విచారం వ్యక్తం చేశారు.